ఆటగాడిగా వచ్చి.. ఇప్పుడు కోచ్‌గా.. ముంబై ఇండియన్స్‌ పగ్గాలు పొలార్డ్‌ చేతికి

ఐపీఎల్‌లో ముంబై ఇండియన్స్‌తో ఆటగాడిగా ఎన్నో విజయాల్లో భాగమైన వెస్టిండీస్‌ మాజీ ఆల్‌రౌండర్‌ కీరన్‌ పొలార్డ్‌.. ఇప్పుడు అదే జట్టుకు ప్రధాన కోచ్‌గా బాధ్యతలు చేపట్టనున్నాడు. ముంబై ఇండియన్స్‌ యాజమాన్యం శనివారం ఈ విషయాన్ని ప్రకటించింది. ఆటగాడిగా, బ్యాటింగ్‌ కోచ్‌గా జట్టుతో అనుబంధం కొనసాగించిన పొలార్డ్‌కు ఇప్పుడు మొత్తం జట్టును నడిపించే బాధ్యతలు అప్పగించింది. జట్టు విజయాల్లో కీలక పాత్ర పోషించిన అతడు.. ఇకపై కోచ్‌గా తన అనుభవాన్ని ఉపయోగించనున్నాడు.

16 ఏళ్లుగా మా కుంటుంబంలో భాగం: నీతా అంబానీ
పొలార్డ్‌ నియామకంపై ముంబై ఇండియన్స్‌ సహ యజమాని నీతా అంబానీ సంతోషం వ్యక్తం చేశారు. ‘‘పొలార్డ్‌ 22 ఏళ్ల యువకుడిగా ముంబై ఇండియన్స్‌లో చేరాడు. గత 16 ఏళ్లుగా మా కుటుంబంలో భాగమయ్యాడు. ఆటగాడిగా ఎన్నో మరపురాని క్షణాలను అందించాడు. కోచ్‌గా తన అనుభవాన్ని, ఆటపై ఆసక్తిని, లోతైన అవగాహనను జట్టుతో పంచుకున్నాడు. ఇప్పుడు ప్రధాన కోచ్‌గా కొత్త బాధ్యతలు చేపట్టడం ఆనందంగా ఉంది’’ అని ఆమె పేర్కొన్నారు.

ముంబై జెర్సీ ధరించడం, ఆ జట్టు తరఫున ఆడటంలో ఉండే బాధ్యతలు పొలార్డ్‌కు బాగా తెలుసని నీతా అంబానీ అన్నారు. కొత్త పాత్రలోనూ అదే నిబద్ధత, విశ్వాసం, పట్టుదలతో పనిచేస్తాడని ఆశాభావం వ్యక్తం చేశారు. జట్టును తదుపరి దశకు నడిపించే క్రమంలో అతడికి శుభాకాంక్షలు తెలిపారు.

జట్టుపై పూర్తి అవగాహన
టీ20 క్రికెట్‌లో వచ్చిన మార్పులను దగ్గరగా చూసిన పొలార్డ్‌కు ఆటలోని కొత్త వ్యూహాలు, పోటీ తీవ్రతపై మంచి అవగాహన ఉంది. ముంబై ఇండియన్స్‌ ఆటగాడిగా, ఆ తర్వాత బ్యాటింగ్‌ కోచ్‌గా పనిచేయడం అతడికి ప్రత్యేక అనుభవాన్ని ఇచ్చింది. జట్టు సంస్కృతి, ఆటగాళ్ల సామర్థ్యాలు, అత్యున్నత స్థాయిలో పోటీపడేందుకు అవసరమైన అంశాలపై అతడికి స్పష్టమైన అవగాహన ఉందని ఫ్రాంచైజీ పేర్కొంది. జట్టు విజయాల పరంపరను కొనసాగించడంతో పాటు యువ ప్రతిభను తీర్చిదిద్దడంలో అతడి నాయకత్వం ఉపయోగపడుతుందని తెలిపింది.

మరిన్ని విజయాలు అందించేందుకు కృషి చేస్తా: పొలార్డ్‌
ప్రధాన కోచ్‌గా బాధ్యతలు చేపట్టడం గౌరవంగా భావిస్తున్నానని పొలార్డ్‌ తెలిపాడు. ‘‘ముంబై ఇండియన్స్‌ నా జీవితంలో, క్రికెట్‌ కెరీర్‌లో ఎంతో ముఖ్యమైన భాగం. ఈ జట్టు, ఆటగాళ్లు, అభిమానులతో నాకున్న అనుబంధం ప్రత్యేకం. ఆటగాడిగా, ఆ తర్వాత కోచ్‌గా ఈ ప్రయాణంలో భాగమయ్యాను. ముంబై ఇండియన్స్‌ దేనికి ప్రతీకో, ఆ జట్టు తరఫున ప్రాతినిధ్యం వహించడంలో ఉండే బాధ్యత ఏంటో నాకు తెలుసు’’ అని పేర్కొన్నాడు.

తనపై నమ్మకం ఉంచిన నీతా అంబానీ, ఆకాశ్‌ అంబానీ, ముంబై ఇండియన్స్‌ కుటుంబానికి కృతజ్ఞతలు తెలిపాడు. ఆటగాళ్లు, సహాయక సిబ్బందితో కలిసి పనిచేస్తూ జట్టు వారసత్వాన్ని ముందుకు తీసుకెళ్తానన్నాడు. ప్రతిభావంతులైన ఆటగాళ్లను మరింత మెరుగుపరచడంతో పాటు అభిమానులు సంబరాలు చేసుకునేలా మరిన్ని విజయాలు అందించేందుకు కృషి చేస్తానని చెప్పాడు.

జయవర్ధనే తర్వాత కీలక బాధ్యతలు
ముంబై ఇండియన్స్‌ గతంలో మహేల జయవర్ధనే ఆధ్వర్యంలో మూడు ఐపీఎల్‌ టైటిళ్లు సాధించింది. రెండు విడతల్లో ప్రధాన కోచ్‌గా పనిచేసిన ఆయనతో జట్టు అనుబంధం ఇటీవల ముగిసింది. ఈ నేపథ్యంలో పొలార్డ్‌కు ప్రధాన కోచ్‌ బాధ్యతలు అప్పగించడం ప్రాధాన్యం సంతరించుకుంది. ముంబై ఇండియన్స్‌ 2013, 2015, 2017, 2019, 2020లో ఐపీఎల్‌ విజేతగా నిలిచింది. 

ఆ విజయాల్లో ఆటగాడిగా భాగమైన పొలార్డ్‌.. ఇప్పుడు కోచ్‌గా జట్టును మరో విజయాల బాటలో నడిపించాల్సి ఉంది. జట్టు సంప్రదాయాన్ని కొనసాగించడం, కొత్త ప్రతిభను ప్రోత్సహించడం, మైదానంలోనే కాకుండా బయటా అత్యుత్తమ ప్రమాణాలను అందుకోవడం తన నాయకత్వంలో ప్రధాన లక్ష్యాలుగా ఉంటాయని ఫ్రాంచైజీ వెల్లడించింది.